د ټولګټو وزارت د اوسپنيزې کرښې مرستيال د ايران د ولسمشر له استازي سره وکتل
د ا.ا.ا د ټولګټو وزارت د اوسپنيزې کرښې مرستيال محترم مولوي محمد اسحاق صاحبزاده او مل پلاوي ايران هيواد ته د خپل کاري سفر په ترڅ کې د ياد هيواد د ولسمشر له استازي محترم حسن کاظمي قمي او د اوسپنې پټلۍ د پراختيا اړوند د ايراني شرکتونو له مسوولينو سره وکتل.
د ايران هيواد د ولسمشر له استازي سره په ليدنه کې د خواف-هرات د دريمې قطعې له لارې د انتقالاتو پر زياتوالي، له ياد مسير څخه د ايران هيواد پر خاص ملاتړ، د سوداګرۍ او ټرانزيټ د پراختيا لپاره په سيمه ييزه کچه د افغانستان له لارې د نويو مسيرونو پر ايجادولو او نښلولو او د دوه اړخيزه ريلي همکاريو پر موثريت خبرې او ټينګار وشو.
دغه راز د ا.ا.ا د ټولګټو وزارت د اوسپنيزې کرښې مرستيال او مل پلاوي د ايران هيواد د ټرانسپورټي بنسټونو د جوړولو او پراختيا شرکت له اجرائيوي رئيس سره وکتل.
په دغه ليدنه کې په افغانستان کې ترلاس لاندې ريلي پروژو د رشد؛ په ځانګړي ډول د (هرات-نيمروز)، (نيمروز-کندهار) او چابهار ريلي پروژو پر پراختيا مفصل بحثونه ترسره شول.
په دغه کتنه کې ايراني لورې وويل، چې ايراني شرکتونه د يادو ريلي پروژو د احداث په برخه کې پانګونې او په تخنيکي برخه کې لازمې همکارۍ ته چمتو دي او افغانستان کولای سي، چې د ريلي پروژو په برخه کې د ايران هيواد له مهندسۍ څخه، چې په برخه کې کافي تجربه لري؛ ګټه واخلي.
همداراز د ا.ا.ا د ټولګټو وزارت د اوسپنيزې کرښې مرستيال او مل پلاوي د شپږو ريلي شرکتونو له مسوولينو سره، چې په ريلي حوزه کې فعاليت لري؛ ليدنې وکړې.
ياد شپږ شرکتونه چې د اوسپنې پټلۍ په بېلابېلو برخو (د ريل پټلۍ په توليد، احداث. ګټې اخيستنې او ساتنې او څارنې کې فعاليت کوي؛ ژمنې وکړې، چې د افغانستان د اوسپنيزې کرښې د معياري کېدو او پراختيا په برخه کې به لازمې همکارۍ وکړي.
د يادونې وړ ده، چې د ا.ا.ا د ټولګټو وزارت د اوسپنيزې کرښې مرستيال او مل پلاوی په رسمي سفر ايران ته تللی، ترڅو د افغانستان د اوسپنې پټلۍ د پراختيا لپاره د سيمه ييزو هيوادونو همکارۍ او پاملرنه راجلب کړي.
