د سرپل – فاریاب عمومي مسیر د لومړي لاټ رغنیزې چارې د څه باندې ۱ میلیارد او ۲۵۰ میلیونه افغانیو په ارزښت پیل شوې
د ا.ا.ا د ټولګټو وزارت له لوري په سرپل ولایت کې د افغانستان حلقوي سړک د لومړي لاټ ۳۰ کیلومتره برخې رغنیزې چارې د څه باندې ۱ میلیارد او ۲۵۰ میلیونه افغانیو په ارزښت د ټولګټو وزارت د تخنیکي مرستیال محترم الحاج مولوي عبدالکریم فاتح، د سرپل ولایت مرستیال والي محترم ملا خال محمد حقاني او یو شمېر سیمه اییزو مسئولینو په شتون کې رسماً پیل شوې.
یاده پروژه د افغانستان حلقوي سړک یو برخه ده، چې ټولګټو وزارت یې اقتصادي او ټولنیز اهمیت ته په کتو د یاد مسیر د لومړي لاټ د ( سرپل – فاریاب ۳۰ کیلومتره سړک) د رغونې چارې پيل کړې دي، چې د ۳۲ میاشتو په موده کې به یې کار بشپړ او ګټې اخیستنې ته وسپارل شي.
د دغه سړک د کار په جریان کې به د سیمې یو شمېر اوسېدونوکو ته د کار زمینه برابره شي او په بشپړېدو سره به یې د فاریاب او سرپل ولایتونو د اوسېدونکو د تګ راتګ او د سواداګریزو توکو او کرنیزو محصولاتو د انتقال ستونزې د پخوا په پرتله هوارې شي.
