د سالنګونو لویې لارې د سږ کال پلان شویو برخو د بیارغونې کار بشپړ شو
د سالنګونو لویه لار د افغانستان له مهمو او بنسټیزو ترانزیتي لویو لارو څخه شمېرل کېږي، چې د هېواد مرکز له شمالي ولایتونو سره نښلوي. دغه ستره ترانزیتي لاره د حیرتان، شیرخان او آقینې بندرونه له لارې افغانستان د منځنۍ آسیا له هېوادونو، په ځانګړي ډول تاجکستان او ازبکستان سره وصلوي او د کورني او سیمهییز ترانزیت، سوداګرۍ او د مسافرو د تګ راتګ لپاره ځانګړی اهمیت لري.
د سالنګونو لویې لارې د رغونې چارې په ۱۳۳۷ هـ ش کال کې پیل شوې او په ۱۳۴۳ هـ ش کال کې د تونل او اړوندو تاسیساتو کارونه بشپړ شول. د دې لارې په جوړېدو سره د هېواد د شمال او جنوب ترمنځ واټن شاوخوا ۱۱۰ کیلومتره را لنډ شو، چې دا د ترانسپورټ او اقتصادي فعالیتونو په برخه کې یو مهم پرمختګ بلل کېږي.
سره له دې چې یاده لویه لار په تېرو کلونو کې څو ځله بیا رغول شوې وه، خو د رغونې ټیټ کیفیت او د دوامدارې ساتنې او څارنې نشتون د دې لامل شو، چې سړک تخریب شي او د تګ راتګ پر وړاندې جدي ستونزې رامنځته کړي.
د همدې ستونزو د هواري په موخه، د ا.ا.ا د ټولګټو وزارت د اقتصادي تګلارې سره سم د سالنګونو لویې لارې د ۸۰ کیلومتره سړک د اساسي بیا رغونې چارې د ۱۴۰۲ هـ ش کال د اسد په میاشت کې د شمالي سالنګ، سویلي سالنګ او دوشي–خنجان په برخو کې پیل کړې. د دې پروژې مالي لګښت د عالیقدر امیرالمؤمنین حفظهالله تعالی د ځانګړي فرمان له مخې د ټول پلازا له عوایدو څخه تمویلېږي.
د یاد سړک کانکریټي چارې په درېیو طبقو کې ترسره شوې، چې ټولیز ضخامت یې ۸۵ اعشاریه ۵ سانتي مترو ته رسېږي. همداراز، د کانکریټ پر وروستۍ طبقه د اسفالټ محافظتي لایه اچول شوې، څو د سړک د تخریب او تخریش مخه ونیول شي.
د ټولګټو وزیر محترم الحاج ملا محمد عیسی ثاني د یادې لویې لارې د بیا رغونې له چارو څخه وخت پر وخت لیدنه کړې او اړوندو تخنیکي ټیمونو او د قراردادي شرکتونو مسؤلینو ته یې د کار د لوړ کیفیت، چټکتیا او پر ټاکلي وخت د بشپړېدو په اړه لازمې لارښوونې کړې دي.
په ورته وخت کې، د سالنګونو لویې لارې د دوشي–خنجان برخې د لومړي لاټ لس کیلومتره سړک د اسفالټ چارې هم بشپړې شوې دي. دا مهال د ټولګټو وزارت له لوري د یادې لویې لارې اړوند د پلان شویو مهمو برخو چارې بشپړې شوې دي او پاتې کارونه به یې د راتلونکي کال د کاري پلان له مخې ترسره شي.
د سالنګونو لویې لارې څخه تېرېدونکي مسافر او موټرچلوونکي د یادې لارې د بیا رغونې له چارو خوښي څرګندوي او وایي، چې د پخوا په پرتله یې په تګ راتګ کې د پام وړ اسانتیاوې رامنځته شوې دي.
بلخوا، د سالنګونو لویې لارې موظف پرسونل د لارې دوامداره ساتنه او څارنه ترسره کوي او د ژمي په موسم کې د واورې او کنګل پر مهال د مالګې او خاورې د شیندلو، د ځنځیر (چین) د تړلو د لارښوونو او د شپه او ورځ ګزمو له لارې د مسافرو خوندیتوب تضمینوي.
د سالنګونو لویې لارې اساسي بیا رغونه به د هېواد د شمالي ولایتونو او د منځنۍ آسیا هېوادونو ته د کرنیزو محصولاتو او تجارتي توکو د خوندي او منظم لېږد رالېږد زمینه برابره کړي. د دې لارې د معیاري کېدو سره به د مسافرو ستونزې تر ډېره هوارې شي او خلک به وکولای شي په اسانه، خوندي او چټک ډول تګ راتګ وکړي.
