د ټولګټو وزارت محترم وزیر د کاپیسا ولایت تر کار لاندې پروژو څخه لیدنه وکړه
د ا.ا.ا د ټولګټو وزیر محترم الحاج ملا محمدعیسی ثاني کاپیسا ولایت ته د خپل کاري سفر په ترڅ کې پرون یکشنبې د تګاب او الهسای ولسوالیو د نښلوونکو سړکونو له کاري بهیر څخه لیدنه وکړه.
محترم وزیر صاحب په دغه سفر کې د یادو پروژو د قراردادي شرکتونو له مسئولینو او تطبیق کوونکو ټیمونو سره وکتل او هغوی ته یې د کار د چټکتیا، د غوره کیفیت او پر وخت د بشپړولو په اړه لازمې لارښوونې وکړې. همدارنګه یې د کاپیسا ولایت د ټولګټو رئیس او تخنیکي کارکوونکو ته دنده وسپارله، څو له دغو پروژو څخه په دوامداره او منظم ډول څارنه او نظارت ترسره کړي.
د کاپیسا ولایت د الهسای ولسوالۍ سړک ۱۸.۵ کیلومتره اوږدوالی او ۹ متره پلنوالی لري، چې په اوږدو کې یې د یو شمېر پلګوټو او استنادي دېوالونو د جوړولو چارې هم شاملې دي، او د یادې پروژې ټولیز لګښت ۶۴۹ میلیونه افغانیو ته رسېږي.
همدارنګه د یاد ولایت د تګاب ولسوالۍ سړک شاوخوا ۱۳.۶ کیلومتره اوږدوالی لري، چې د تګاب ولسوالۍ او بدرآب دره د کاپیسا ولایت له مرکز سره نښلوي. د دې سړک رغنیزې چارې د ټولګټو وزارت او خصوصي سکتور ترمنځ د څه باندې ۳۶۴ میلیونه افغانیو په ارزښت قرارداد شوې دي او دا مهال عملاً جریان لري.
دا په داسې حال کې ده چې د خلکو د هوساینې او پرمختګ په موخه د کاپیسا ولایت د نجراب ولسوالۍ اړوند د افغانیه درې – غ – پچغان سیمو د ۱۳.۷ کیلومتره سړک رغنیزې چارې هم د ۳۹۲ میلیونه افغانیو په ارزښت روانې دي.
د یادونې وړ ده چې د ټولګټو وزارت محترم وزیر د تېرې جمعې په ورځ د پروان ولایت ته هم سفر کړی و او د بګرام – جبل السراج سړک څخه یې لیدنه کړې وه، چې د هېواد پر زیربنایي پروژو د وزارت د رهبرۍ د دوامدار نظارت څرګندونه کوي.
