د ا.ا.ا د ټولګټو وزیر د اوزبیکستان د لومړي وزیر له مرستیال سره وکتل
د ا.ا.ا د ټولګټو وزیر، محترم الحاج ملا محمد عیسی ثاني، پرون په ارګ کې د اوزبیکستان د لومړي وزیر له مرستیال، محترم جمشید خواجهیف سره وکتل او د دواړو هېوادونو ترمنځ یې د اقتصادي او ترانزیټي همکاریو د پراختیا او د اوسپنې پټلۍ د یو شمېر مهمو بنسټیزو پروژو په اړه خبرې اترې وکړې.
د لیدنې په پیل کې د افغانټرانس د اوسپنې پټلۍ پروژې د مطالعاتو د پیل نېټې د ټاکلو په اړه خبرې وشوې او دواړو لورو د دې مهمې سیمهییزې پروژې پر چټک پرمختګ ټینګار وکړ. همدارنګه، د تورغونډۍ بندر پراختیا د دې ناستې له مهمو محورونو څخه وه. د اوزبیکستان د لومړي وزیر مرستیال د خپل هېواد له لوري د یاد بندر د پراختیا په برخه کې د پانګونې لپاره چمتووالی څرګند کړ او دا یې د دواړو هېوادونو ترمنځ د ترانزیټي او سوداګریزو همکاریو د پیاوړتیا لپاره یو مهم ګام وباله.
ورپسې، دواړو لورو د هرات–مزارشریف د اوسپنې پټلۍ د پروژې په اړه هم خبرې وکړې او اوزبیکستاني لوري په دې پروژه کې د پانګونې لپاره خپله لېوالتیا څرګنده کړه.
د حیرتان بندر له لارې د سوداګریزو توکو د لېږد رالېږد د کچې لوړول هم د دې لیدنې له مهمو موضوعاتو څخه وو. په دې برخه کې دواړو لورو د انتقالاتو د زیاتوالي، د ترانزیټي همکاریو د پراختیا او سوداګرو ته د لا زیاتو اسانتیاوو پر برابرولو ټینګار وکړ، ترڅو د سوداګرۍ او ترانزیټ بهیر لا چټک شي.
همدارنګه، دواړو لورو د سالنګ پر لویه لار د سوداګریزو توکو د لېږد د بهیر په اړه هم خبرې وکړې. د ټولګټو محترم وزیر څرګنده کړه، چې د ترانزیټ د اسانتیاوو د لا ښه کېدو په موخه، د سالنګ لویې لارې د اساسي بیارغونې چارې د پخوانیو ترسره شویو کارونو په دوام په چټکۍ سره جریان لري.
محترم الحاج ملا محمد عیسی ثاني په دې لیدنه کې ډاډ ورکړ، چې دامهال په افغانستان کې د پانګونې بشپړه زمینه برابره ده او د اوزبیکستان هېواد کولای شي د ا.ا.ا د اصولو، قوانینو او معیارونو په رعایتولو سره په یادو برخو کې پانګونه او فعالیت وکړي. نوموړي همدارنګه د ګډو پروژو په پلي کېدو کې د ټولګټو وزارت پر همکارۍ او ملاتړ ټینګار وکړ.
د لیدنې په پای کې دواړو لورو د افغانستان او اوزبیکستان ترمنځ د اقتصادي همکاریو، ترانزیټي او دوهاړخیزو اړیکو پر لا پراختیا ټینګار وکړ او دا یې د دواړو هېوادونو د مشترکو منافعو د تأمین لپاره مهم او ګټور وبلل.
