جايکا ټولګټو وزارت ته د همکاريو د دوام ډاډ ورکړ
د ټولګټو وزارت وزير انجنیر نجیب الله یمین د جاپان هېواد د نړيوالو همکاريو ادارې (جایکا) له مسؤلینو سره د ویډیو کنفرانس لارې خبرې وکړې.
په دې ويډيو کنفرانس کې د ټولګټو وزارت د همکارانو تر څنګ د افغانستان دپاره د جاپان د نړيوالو همکاريو ادارې مشر کينسيوک څوجي (Kensuke Tsuji)، د يادې ادارې مرستيال يويا ساتو (Yuya Sato) او د پروګرام مسوول وحيدالله سباوون برخه درلودله.
په پيل کې د ټولګټو وزیر نجيب الله يمين د جاپان او افغانستان د اوږدمهاله اړيکو او د هغه هېواد لخوا د کېدونکو بشري مرستو په ارزښت هر اړخيزې خبرې – اترې وکړې. نوموړي د جاپان هېواد د بشري همکاريو د يوې مهمې بېلګې په توګه د جاپاني الاصله افغان ډاکټر تیتسو ناکامورا يادونه وکړه او د نوموړي هڅې يې د دواړو هېوادونو تر منځ د انساني اړيکو ستر روايت وګڼلې.
نوموړي زياته کړه: جاپان او افغانستان به په ګډه د ارواښاد ناکامورا د آبادۍ فکر او تګلاره د تل دپاره خپل سرمشق ګرځوي.
د جایکا ادارې د افغانستان د برخې مشر کينسيوک څوجي له ټولګټو وزیر سره د تعارفي ليدنې له امله خوښي وښودله.
نوموړي زياته کړه چې جايکا اداره به په پرمختيايي او بشري برخو کې د خپلو پخوانيو همکاريو په څېر نورو مرستو ته هم دوام ورکړي او د همکاريو د دوام په هدف يې د دا ډول نورو کنفرانسونو پر جوړیدا لا زيات ټينګار وکړ.
د یادولو وړ ده، چې د ټولګټو وزارت لخوا د جاپان هېواد د تل پاتې همکاریو د دوام او په ځانګړي ډول د جايکا ادارې له همکاريو څخه د مننې په موخه هغوی ته ځانګړې معنوي ډالۍ هم ورکړل شوې.
