د افغانستان اسلامي امارت لخوا د سالنګ لویې لارې د ترمیم چارې د څه باندې ٥٣ میلیونه افغانیو په ارزښت پیل شوې
د سالنګ د ٣٠ کیلومتره لویې لارې د ترمیم چارې د ټولګټو وزارت د مالي او ادارې مرستیال، بخت الرحمن شرافت د رسمي سفر په ترڅ کې چې تخنیکي ټیم او د پروان ولایت د والي مرستیال یې هم ملتیا کوله پیل شوې.
د یادې پروژې په پرانیست غونډه کې، د ټولګټو وزارت مالي او ادارې مرستیال، بخت الرحمن شرافت وویل: د ټولګټو وزارت رهبري د کار په لومړیو ورځو کې له تخنیکي ټیمونو سره له مشورو او هر اړخیزو څیړنو ورسته اسیب مننوکیې برخې تشخیص او د ترمیم پریکړه یې وکړه؛ تر څو دا مهم اقتصادي دهلیز په بیړني ډول ترمیم کړي او په راتلونکې ژمي موسم کې د خلکو د تګ راتګ پر مهال پر یاده لویه لار را ولاړې شوي ترانسپورتي ستونزې هواري کړي.
د ټولګټو وزارت مالي او ادارې مرستیال همدا راز زیاته کړه: چې د سالنګ لویه لار به په دوو بیلابیلو برخو کې ترمیم شي؛ لومړۍ برخه یې په سویلي سالنګ کې د ١٥ کیلومترو په اوږدوالي سره د ٢٦،٧٠٠،٠٠٠ افغانیو په ارزښت، له میر ودان خصوصي ودانیز شرکت سره لاسلیک شوي او دویمه برخه یې په شمالي سالنګ کې د ١٥ کیلومترو په اوږدوالي له نوي سپین غر لمتید شرکت سره د ٢٦،٧٠٠،٠٠٠ افغانیو په ارزښت لاسلیک شوي او ټاکل شوي تر راتلونکې یوې میاشتي پورې یې کار بشپړ شي.
هغه همدارنګه زیاته کړه چې د سالنګ د تونل دننه ترمیم په تخنیکي پړاو کې دی او ډیر ژر به یې عملي کار پیل شي او د یادې لویې لارې ١٢ کیلومتره سړک چې له اولنګ سیمې څخه تر جبل السراج پورې غځیږي د سالنګونو د ساتنې او څارنې ریاست لخوا یې د ترمیم چارې پرمخ وړل کیږي.
ورپسې د پروان ولایت د والي مرستیال، قومي مخورو او د تخنیکي ټیم غړیو په نوبت سره خبرې وکړې او د دې پروژې له تطبیق څخه یې خوښي څرګنده کړه او د پروژې په تطبیق کې یې د همکارۍ ژمنه وکړه.
د افغانستان اسلامي امارت د ټولګټو وزارت رهبري هڅه کوي تر څو د خلکو ترانسپورتي ستونزې هواري کړي، نوي پراختیایې پروژې پلي او د نیم کاره پروژو رغنیز کار بشپړ کړي.
د ټولګټو وزارت رسنیز دفتر
