د جومات اونۍ د پیل او د ۲۷ روژې په مناسبت ټولګټو وزارت کې جومات پرانستل شو
د جومات اونۍ د پیل او د ۲۷ روژې په مناسبت ټولګټو وزارت کې جومات پرانستل شو
د غوایي ۱۹مه، ۱۴۰۰
د جومات اونۍ په لړ او د روژې د مبارکې میاشتې د ۲۷ مې نیټې په مناسبت د ټولګټو وزارت په انګړ کې یو باب جومات پرانیستل شو.
یاد جومات چې تازه یې رغنېزې چارې بشپړې شوي، د نارينه لمونځ کوونکو تر څنګ د ميرمنو لپاره هم ځانګړي ځايونه، منظم کتابتون او د مطالعې لپاره مناسب ځای لري.
دا جومات نن ورځ د یو لړ مراسمو په ترڅ کې د دې وزارت د وزیر انجنیر نجیب الله یمین، د وزارت د مرستیالانو، رئیسانو، د ولسي جرګې د یو شمېر استازو او کارکوونکو په شتون کې پرانستل شو.
په همدې موخه جوړو شویو مراسمو کې د ټولګټو وزیر انجنیر نجیب الله یمین، د خپلو خبرو په ترڅ کې د روژې د مبارکې میاشتې په فضیلت او د دې مبارکې میاشتې د وروستۍ لسیزې په لړ کې د قران عظیم الشان د نزول په اړه خبرې وکړي او ویې ویل: جومات چې د سجدې د ځای په مانا دی، د ځمکې پر سر تر ټولو غوره او مقدس ځای دی.
هغه همدارنګه زیاته کړه، هغه څوک چې د جومات د معنوي او فزیکي جوړښت په برخه کې کار کوي، هغوی ریښتیني انسانان او په الله پاک ج پوره ایمان لرونکي خلک دي.
د ټولګټو وزیر د اسلام د ستر پیغمبر آنحضرت محمد مصطفی (ص) د مبارک حدیث مفهوم بیان کړ او ویي ویل: څوک چې جومات جوړ کړي یا یې د جوړلو نیت وکړي او یا هم د جومات په جوړلو کې همکاري وکړي، الله (ج) به په جنت کې ورته کور جوړ کړي.
د ټولګټو وزیر ښاغلي یمین جومات د زده کړي او مبارزې مرکز وبلل او زیاته یي کړه جومات د اسلام مرکز دی او محراب یې د حرب ځای دی چې له دې ځایه د اخلاقو، فکري لوړتیا او تمدن جوړول پیلېږي.
د ټولګټو وزیر یاد جومات چې د ټولګټو وزارت په انګړ کې جوړ شوی، له بیسارو هغو جوماتونو څخه وبلل چې د ښځينه لمونځ کونکو لپاره هم مناسب او ځانګړی ځای لري.
هغه همدا راز د جومات د حفاظت او ساتنې په برخې ټینګار وکړ او له هغو کارکونکو څخه یې مننه وکړه، چې د یاد جومات په جوړلو کې يې نه ستړي کیدونکې هڅې کړې وي.
