د قیصار – لامان حلقوي سړک د درېیم لاټ ۵۰ کیلومتره برخې رغنیزې چارې د څه باندې ۴.۶ میلیارده افغانیو په ارزښت جریان لري
د بادغیس ولایت اړوند د قیصار–لامان د حلقوي سړک د درېیم لاټ پروژه، چې ۵۰ کیلومتره اوږدوالی او ۱۲ متره پلنوالی لري، د ۴ میلیارده، ۶۵۲ میلیونه او ۵۳۶ زره افغانیو په ارزښت د ا.ا.ا د ټولګټو وزارت له لوري له خصوصي سکتور سره قرارداد شوې ده او دا مهال یې رغنیزې چارې په بېلابېلو برخو کې په منظم ډول روانې دي.
دا سړک د افغانستان د حلقوي سړک یوه مهمه برخه ده، چې د بادغیس ولایت د مقر ولسوالۍ څخه پیلېږي او د همدې ولایت د بالامرغاب ولسوالۍ پر لوري غځېږي. د دې پروژې په اوږدو کې د یو شمېر مصنوعي ساختمانونو د جوړولو چارې هم شاملې دي، چې په اساسي ډول به ورغول شي. د دغه پروژې د پلي کېدو پر مهال یو شمېر هېوادوالو ته د کار زمینه هم برابره شوې ده.
د یادونې وړ ده، چې د دغه سړک د یوې بلې ۲۵ کیلومتره برخې د رغونې چارې هم تېر کال د ټولګټو وزارت له لوري د فاریاب ولایت له طرفه پیل شوې وې، چې دا مهال عملاً جریان لري.
د هېواد حلقوي سړک له مهمو زېربنايي پروژو څخه شمېرل کېږي، چې د پاتې برخو په بشپړېدو سره یې د فاریاب، بادغیس او هرات ولایتونه یو بل سره نښلول کېږي او د شمالي ولایتونو او لوېدیځې حوزې ترمنځ د خلکو د تګ راتګ او د سوداګریزو توکو د لېږد رالېږد په اسانتیا کې مهم رول لري.
د ا.ا.ا د ټولګټو وزارت د هېواد د ترانسپورتي شبکې د پراختیا له لارې هڅه کوي، چې هېوادوالو ته د خوندي او اسانه تګ راتګ زمینه او سوداګرو ته لا ډېرې اسانتیاوې برابرې کړي.
