د ملي بیرغ د ملي ورځې په اړه د ټولګټو وزارت اعلامیه
ملي بیرغ د افغانستان سمبول، د هویت نښان د او متحد ملت څرګندوی دی چې د همدغو ارزښتونو له کبله یې، د زمري میاشتې ۷مه نېټه د بیرغ د ملي ورځې په نامه یاده شوې ده.
د افغانستان د اساسي قانون نولسمه ماده د ملي بیرغ په اړه داسې روښنايي لري:
د افغانستان بیرغ له: دريو تور، سور او زرغون رنګه ټوټو څخه جوړ دى. درې واړه ټوټې په مساوي ډول له كيڼ نه ښي لور ته په عمودي ډول سره پرتې وي او د هر رنګ سور د هغه د اوږدو نيمايي دى چې په منځ كې يې دافغانستان ملي نښان ځاى پرځاى شوى دى.
دافغانستان د دولت ملي نښان له سپين رنګه محراب او منبر څخه جوړ دى چې په دوو څنډو كې يې دوه بيرغونه او د منځ په برنۍ برخه كې يې د لا اله الا الله محمد رسول الله مباركه كلمه او الله اكبر او د راختونكي لمر وړانګې او په لاندنۍ برخه كې يې د 1298 هجري شمسي تاريخ او د افغانستان كلمه راغلې چې له دوو خواوو څخه دغنمو وږي پري راګرځول شوي دي.
ټولګټ وزارت د دې درې رنګه ملي جنډې تر اعزاز لاندې د ګران هېواد آبادۍ ته ژمن دی او هڅه به کوي چې د سړکونو له لارې په غوره معیارونو سره هېواد د سیمې د نښلون پر مرکز بدل کړي.
د ټولګټو وزارت رهبري دا پرتمینه جنډه تل رپانده غواړي او تر سوري لاندې یې د هېواد دروند ملت ته د یوالي او راټولېدنې دعا کوي.