د میل ۷۸ سړک د ۲۳ کیلو متره پاته برخې رغنیزې چارې پیل شوې
د ټولگټو وزیر انجنیر نجیب الله یمین فراه ولایت ته د خپل سفر پر مهال چې ایراني پلاوي یې هم ملتیا کوله د میل ۷۸ سړک د ۲۳ کیلو متره پاته برخې چارې د پټۍ په پرې کولو سره رسماً پیل کړې.
د دې سړک اوږدوالی ټولټال ۱۱۷ کیلو متره کیږي چې د فراه ولایت مرکز له ایران سره نښلوي او د ایران اسلامي جمهوریت یې شاوخوا ۱۵ کاله وړاندې د رغونې ژمنه کړې وه چې اوس مهال یې پر پاته برخه هم جدي کار پیل شو.
د یاد سړک چارې په دریو برخو وېشل شوې چې ۶۴ کیلو متره یې بشپړ شوی، ۳۰ کیلو متره تر کار لاندې او د پاته ۲۳ کیلو متره سړک چارې یې تازه پیل شوې.
دا سړک ۱۱ متره پلنوالی لري چې ۷.۳ متره یې د موټرو د تگ راتگ لپاره اسفالټ یا قیر کیږي او د ۲۰ میلیونه ډالرو په ارزښت د ایران له مرسته شویو پیسو رغول کیږي.
ایراني پلاوي دا ژمنه هم وکړه چې د جوړ شوي سړک ورانې شوې برخې به له سره ترمیم کړي چې په دې سره به له سړک څخه د اوږده مهال لپاره ګټه اخستل کیږي.
د ابونصر فراهي بندر له ایران سره د افغانستان له مهمو بندرونو څخه دی چې د میل ۷۸ سړک په بشپړېدو سره به له دې لارې د دواړو هیوادونو تر منځ راکړه ورکړه نوره هم پراخه شي.
د غوایي ۱۵مه، ۱۴۰۰
د ټولګټو وزارت مطبوعاتي څانګه
