د نورستان له مرکز تر کامدیش ولسوالۍ پورې د جغلي سړک رغنیزې چارې ۶۵ سلنه پرمختګ لري
د ټولګټو وزارت لخوا په لومړي ځل د نورستان کامدیش او برګمټال ولسوالۍ د سړک په مرسته له مرکز پارون سره نښلي.
یادو ولسوالیو ته نوی جوړېدونکی جغلي سړک چې ۲۵.۸ کیلومتره اوږدوالی لري، د پارون اړوند له ایشټیوي کلي څخه پیل او د کامدیش ولسوالۍ پورې غځیږي، چې اوس مهال یې رغنیزې چارې له ۶۵ سلنه کاري پرمختګ سره روانې دي.
د جغلي سړک د رغیدا دا پروژه، د ټولګټو وزارت او سیمه ییزو پراختیایي شوراګانو ترمنځ تړون شوي، چې مالي لګښت یې د هېواد له پراختیایي بودیجې څخه ورکول کېږي.
د یاد سړک د رغنیز کار په بهیر کې د سیمې اوسېدونکو ته ګڼې کاري ورځې هم رامنځته شوي، چې د چارو له بشپړېدو سره به یې، د نورستان کامدیش او برګمټال ولسوالۍ د نورستان له مرکز پارون ښار سره ونښلي.
لکه څنګه چې د نورستان ډیری سیمې غرنۍ دي او خلک یې د تګ ـ راتګ په برخه کې له ګڼو ستونزو سره مخ دي، د دې ستونزو د هوارې په پار ټولګټو وزارت هڅه کوي چې د اسفالټ یا پخو سړکونو تر څنګ د جغلي سړکونو په رغونه کې هم یاد ولایت ته پاملرنه زیاته کړي، چې ورسته به یې له پلان سره سم په پاخه او اساسي ډول سره نور کارونه هم وشي.
