د هرات ـ چشت شریف لومړي لاټ سړک رغنیزې چارې ۵۱ سلنه پرمختګ لري
د هرات - چشت شریف لومړی لاټ سړک ۳۵ کیلومتره اوږدوالی او د سړک دواړو خواوو ته د یو، یو متر اوږو په درلودلو سره ۱۲.۵ پلنوالی لري چې په اوږدو کې یې ۲۹۴۰ متره لښتي او ۶۰۰ متره استنادي دیوالونه هم جوړيږي.
د دې پروژې تړون د ټولګټو وزارت او یوه ترکي خصوصي ودانیز شرکت تر منځ شوی چې مالي لګښت یې د هیواد له ملي بودیجې څخه ورکول کیږي.
د هرات ـ چشت شریف سړک د ختیځ ـ لویدیځ دهلېز یوه مهمه برخه ده چې په جوړېدو سره به یې د خلکو ګڼې ترانسپورتي ستونزې هوارې او د چشت شریف ولسوالۍ د مرمر ډبرو په لیږد کې مرسته وکړي.
د یادوني وړ ده چې د هرات - چشت شریف سړک ټولټال ۱۵۵ کیلومتره اوږدوالی لري او په پنځو برخو ویشل شوی چې لومړی لاټ یې ۳۵ کیلومتره او پاته څلور لاټونه یې هر یو ۳۰ کیلومتره اوږدوالی لري.
