د هیواد د لویو لارو او سړکونو د عمومي وضعیت څرنګوالی
غور: د غور – هرات او غور – کابل لویې لارې په ځینو برخو کې د واورې نرم اورښت دوام لري او د بندبایان او سبزه وار تلخک مسیرونه د تېزې واورې له کبله بند شوي دي، چې د قراردادي شرکت له لوري یې دا مهال د پاکوالو کار په چټکۍ سره دوام لري.
دایکندي: په دې ولایت کې هوا وریېځ ده، د پاتو ولسوالۍ – بیري کلي، د ورسل کوتل دواړه لوري او له سفید سنگ بازار څخه تر گرگي سیمې پورې غځیدلې لارې د واورې له کبله بندې شوي دي، خو د دې ولایت نورې غځیدلې لارې بیا د تگ راتگ پرمخ تر دې مهاله پرانیستې دي.
زابل: د زابل ولایت د خاک افغان ولسوالۍ غځیدلې لار د سختو واورو له کبله بنده شوې ده، چې د هوا له ښه والي سره به یې د پاکولو کار پیل شي.
د سالنگ لویه لار: په سالنگ لویه لار کې دا مهال د واورې اورښت درېدلی دی او له ټیلري یا باروړنکو موټرو پرته واړه موټر د ترافیکي مقراراتو او چاین ( ځنځیر ) په تړلو سره کولی شي، چې په دې لویه لار له دواړو لورو تگ راتگ وکړي.
همدارنګه؛ د غزني – زابل، زابل – کندهار، کابل – ماهیپر – سروبي، لوگر – کابل، کابل – میدان وردگ او میدان وردگ - بامیانو ولایتونو په ټولو غځیدلو لویو لارو کې د واورې اورښت دوام لري، خو ټولې لارې یې د ترافیکو د تگ راتگ پرمخ پرانیستې دي.
ټولګټو وزارت له موټر چلوونکو او مسافرو څخه هیله کوي چې؛ د تګ راتګ پرمهال ترافیکي مقررات په پام کې ونیسي، د موټر ځنځیر ( چاین ) وتړي، تاوده کالي او اضافه غوړي له ځان سره ولري، له تېز تګ راتګ څخه ډډه وکړي او د مؤظفو کسانو لارښوونې په پام کې ونیسي تر څو چا ته ځاني او مالي زیان ونه رسیږي.
