د هیواد د لویو لارو او سړکونو د وضعیت څرنګوالی
د ټولګټو وزارت د ولایتي ریاستونو د راپورنو په اساس د هیواد د لویو لارو او سړکونو وضعیت په لاندې ډول دی:
میدان وردګ: آسمان شین دی، له حاجیګک کوتل پرته د دې ولایت نورې ټولي غځېدلي لارې د تګ راتګ پرمخ پرانیستې دي.
غور: آسمان لمر دی، له بند بایان مسیر څخه پرته نورې ټولي غځېدلي لارې د ترافیکو پرمخ پرانیستې دي، د بند بایان لار د پاکولو کار د قرارادداي شرکت له لوري دوام لري.
بدخشان: په دې ولایت کې هم آسمان لمر دی، د راغستان، کوهستان او یاوان مسیرونه د ترافیکو پرمخ تر دې مهاله بند دي؛ خو د دې ولایت نورې لارې بیا پرانیستې دي.
دایکنډي: هوا لمریزه ده، د میانه قل او د پاتو ولسوالۍ لارو تر څنګ د ورس او لوزان کوتل دواړه لوري د تګ راتګ پرمخ بندې شوې دي، همدارنګه د دوراهی شش – لکک کوتل پر لار برف کوچ راغلی او یاد مسیر دا مهال د ترافیکو پرمخ بند دی چې د پاکولو کار یې دوام لري، نور مسیرونه تر دې مهاله پرانیستې دي.
هرات: آسمان لمر دی، د هرات – ګلران لار، د ورستیو سیلابونو د پاتې شونو له کبله د باروړنکو موټرو پر مخ بنده ده؛ خو نورې لارې بیا پرانیستې دي.
فراه: په دې ولایت کې له شیخ ابو نصر فراهي سړک څخه پرته نورې ټولي لارې د ترافیکو پرمخ پرانیستې دي.
د سالنګ لویه لار: هوا لمر ده، له ټیلري موټرو پرته واړه موټر د ځنځیر (چاین) په تړلو سره له دواړو لورو تګ راتګ کولی شي.
ټولګټو وزارت، له ټولو موټر چلوونکو او لارویانو څخه هیله کوي چې؛ د تګ راتګ پرمهال ترافیکي مقررات په پام کې ونیسي، د موټر ځنځیر ( چاین ) وتړي، له تېز تګ راتګ څخه ډډه وکړي، تاوده کالي او اضافه غوړي له ځان سره ولري او د مؤظفو کسانو لارښوونې په پام کې ونیسي تر څو چا ته ځاني او مالي زیان ونه رسیږي.
