د واورې د اورښت له کبله تړلي لارې پرانیستل شوې
د وارې د اورښت له کبله تړلي لارې پرانیستل شوې
نن چهارشنبه د لیندۍ ۵ د ټولګټو وزارت د تخنیکي ټیمونو د راپور پر بنسټ د هیواد د یو شمیر ولایتونو موصلاتي لارې د اړوندو ولایتي ټیمونو لخوا پرانیستل شوي او پر ځینو نورو کار روان دی.
له دې ډلې د سالنګ پر لویه لار واړه موټر له چاین تړلو او نورو اړینو توکو سره تګ را تګ کولی شي خو د بار وړونکو موټرو پر مخ لا هم ځکه تړلې چې سړکونو یخ نیولی او د ښوېېدو خطر یې لیدل کیږي، د ټولګټو وزارت تخنیکي ټیمونه هڅه کوي چې یاده لویه لار د بار وړونکو موټرو پر مخ هم پرانیزي.
په ورته وخت کې د غور ولایت د بکک کوتل لار او د پنجشېر ولایت پریان ولسوالۍ لار له واورې پاکه او پرانیستل شوې ده خو د پنجشېر د انجمن کوتل لار د ډیر اورښت له امله د موټرو پرمخ لا هم تړلي ده چې کار پرې روان دی.
دغه راز د بامیانو ولایت اړوند شاه توت کوتل کې هم د واورې د اورښت له کبله لار بنده شوې وه چې تخنیکي ټیمونو له وسایلو او وسایطو سره سیمې ته د لارې د خلاصېدو له پاره رسېدلي.
یاده دې وې چې په تخار، دایکندی، کندوز او بغلان ولایتونو کې د وارې اورښت دوام لري خو لارې د موټرو پرمخ پرانیستي دي.
د ټولګټو وزارت رهبرۍ ټولو اړوندو ادارو ته لارښوونه کړې چې د واورو له کبله د بندو لارو په پرانیستلو کې له ټولو شته امکاناتو څخه ګټه واخلي.
د ټولګټو وزارت ــ کابل
لیندۍ ۵، ۱۳۹۹
