د ټولګتو وزارت سرپرست د کابل ۔ کندهار لویې لارې د ویجاړو پلونو او پلګوټو څخه د ترمیم او بیارغولو په موخه لیدنه وکړه
د ټولګټو وزارت سرپرست محترم الحاج ملا محمد عیسی ثاني، چې د وزارت تخنیکي معین مولوي عبدالکریم فاتح او یو تخنیکي ټیم یې ملتیا کوي، د هېواد جنوب غربي ولایتونو ته د سفر په ترڅ کې یې؛ د کابل – کندهار لویې لارې له ویجاړو پُلونو او پُلګوټو څخه لیدنه وکړه.
د ټولګټو وزارت سرپرست د کابل – کندهار لویې لارې اړوند د سنگرمانده، سوخته او مغلیز پلونو او دغه راز د شهرصفا ولسوالۍ اړوند ویجاړو پُلونو او پُلګوټو څخه له نږدې لیدنه وکړه او دغه راز یې د یادو پُلونو د ترمیم او بیارغولو په موخه د ترکي 77 ساختماني شرکت له استازو سره په ساحه کې وکتل، چې دواړو لورو په دغه برخه کې هر اړخیز بحث او خبرې وکړي.
همدارنګه، د ټولګټو وزارت سرپرست محترم الحاج ملا محمد عیسی ثاني، د کابل – کندهار لویې لارې د بېلابېلو برخو له رغنیزو چارو او د قراردادي شرکتونو له ماشینري او تجهیزاتو څخه هم له نږدې لیدنه ترسره کړي او د پروژې د رغنیزو چارو د چټکتیا او غوره کیفیت په موخه یې قراردادي شرکت، د پروژې څارونکي ټیم او اړوند مسؤولینو ته لازمې لارښوونې وکړې.
د ټولګټو وزارت رسنیز دفتر
