د ټولګټو وزيرد کاپيسا قومي له مشرانو سره د سړکونو د پروژو په اړه له ليدنه وکړه
د کاپيسا ولايت يو شمېر قومي مشرانو د ټولګټو وزارت له وزیر انجنیر نجیب الله یمین سره د نوموړي د کار په دفتر کې ليدنه وکړه چې د هغه ولايت د ځينو سړکونو د رغونې او بيا رغونې پر غوښتنو متمرکزه وه.
په دغه ليدنه کې له قومي مشرانو سره يو ځای په ولسي جرګه کې د کاپیسا ولايت استازي میرحیدر افضلي هم برخه درلوده.
د ناستې په پیل کې راغلیو مشرانو د سړکونو او پلونو په برخه کې د ياد ولايت د خلکو ستونزې، غوښتنې او وړاندیزونه د ټولګټو وازت له رهبرۍ سره مخامخ شريک کړل. هغوی د کاپيسا ولايت له صيادو پل څخه تر مرکز محمودراقي پورې د غځېدلي سړک د جوړولو غوښتنه وکړه او زياتوله يې چې د ياد سړک په جوړېدو سره به د کاپيساوالو ډېرې ستونزې هوارې شي.
د ټولګټو وزارت وزير انجينر نجيب الله يمين هغوی ته د ښه راغلاست تر څنګ ډاډ ورکړ چې اکثره ستونزو او غوښتنو ته به يې رسيده ګي کوي. نوموړي له راغلو مشرانو څخه غوښتنه وکړه چې د صيادو پله څخه تر مرکز محمودراقي پورې د غځېدلي سړک په اوږدو کې د شته اجتماعي ستونزو په هواري کې ورسره همکاري وکړي، تر څو د ياد سړک جوړولو ته زمينه مساعده شي.
ښاغلي يمين زياته کړه: د هېواد په کچه د ټولو سړکونو جوړول زموږ په اوسنيو او راتلونکو کاري پلانونو کې ځای لري، خو موږ په خپل کاري ماموريت کې د پروژو ټاکنه، مهالوېش او تطبيق د ټولنيز عدالت او ملي لومړيتوبونو له مخې تنظيموو.
ټولګټو وزارت ـــ کابل
د کب ۲۸مه، ۱۳۹۹
