د ټولگټو وزارت د سړکونو د ساتنې او څارنې معين د سالنگ له لویې لارې څخه لیدنه وکړه
د ټولگټو وزارت د سړکونو د ساتنې او څارنې معین محترم الحاج معاون ملا عبدالجبار د دغه وزارت د یو شمیر رئیسانو او تخنیکي ټیم په ملتیا سالنگ ته سفر وکړ او د سالنگ لویې لارې له مسیر او د سالنگونو له ریاست څخه یې لیدنه وکړه.
د دغه سفر پرمهال د ټولگټو وزارت د سړکونو د ساتنې او څارنې معین په مشرۍ د سالنگونو ریاست په مرکزي دفتر کې د سالنگونو ریاست د کارکوونکو او د وزارت د یو شمیر رئيسانو او انجنیرانو په گډون ناسته تر سره شوه او د سالنگ د لویې لارې په اړه تخنيکي مشورې، لازمې لارښونې او د ستونزو پر هوارولو بحث او پريکړې وشوې.
همدارنگه په دغه ناسته کې د ټولگټو وزارت د سړکونو د ساتنې او څارنې معین د سالنگ د لويې لارې د ترميم په اړه د معياري پرمختگ لپاره لازمې سپارښتنې او لارښوونې وکړې او ټینگار يې وکړ، چې د هوا له ښه والي سره سم به د سړک د فرش او نورو برخو د رغولو لپاره زمینه برابره کړي.
د یادوني وړ ده، چې د دغه سفر په ترڅ کې د ټولگټو وزارت د سړکونو د ساتنې او څارنې معین د سالنگونو ریاست اړوند وسایطو او ماشینري، د ډبرو ماتولو دستگاه او سالفټ ځایونو څخه لیدنه وکړه او اړوند ریاست ته یې د ترمیم لارښوونه وکړه.
