د کابل ـ کندهار لویه لار د تګ راتګ پرمخ پرانیستل شوه
د کابل ـ کندهار لویه لار، چې د غزني ولایت د مرکز اړوند او د مقر ولسوالۍ په مشکي، صاحب زاده، کرو سای، لونو پمپ او سرکي مانده کلیو کې د تېزو بارانونو او سیلاب را وتلو له امله د تګ راتګ پرمخ بنده شوې وه، اوس مهال د یاد ولایت د ټولګټو ریاست د ماشینري او پرسونل په هڅو بیرته د ترافیکو د تګ راتګ پرمخ پرانیستل شوه.
د غزني ولایت د ټولګټو ریاست ماشینري او پرسونل اوس مهال هم په سیمه کې حضور لري او په او اوبو کې د بندو مسافرو په ژغورلو بوخت دې، چې تر دا مهاله د قرباغ ولسوالۍ د مشکي په کلي کې د مسافرو اړوند یوه عراده رینجر، یوه عاراده ټیلر، یوه عراده ٥٨٠ بس، یوه عراده سراچه، یوه عراده مازدا او یو عراده ویتز موټرونه له نېکمرغه ژغورل شوې دي.
ټولګټو وزارت د کابل ـ کندهار لویې لارې له ټولو مسافرو او د سیمې له اوسیدونکو څخه غوښتنه کوي، چې له اړتیا پرته دې پر دغه مسیر له تګ راتګ څخه په کلکه ډډه وکړي، ځکه لا هم احتمالي سیلابونو خطر شتون لري.
د ټولګټو وزارت رسنیز دفتر
