د کابل - کندهار لويې لارې د پاتې برخو د ترمیم او بیا رغونې کار په بېلا بېلو نورو برخو وېشل کیږي
د ټولګټو وزارت سرپرست وزیر محترم الحاج ملا محمد عیسی ثاني، چې د یاد وزارت یوشمېر رئیسانو او انجینیرانو یې ملتيا کوله؛ د راتلونکي کال په کاري پلان کې د کابل – کندهار لویې لارې د پاتې برخو د کار شمالیدو په موخه له یادې لویې لارې څخه لیدنه وکړه.
ټولګټو وزارت د یادې لویې لارې د ترمیم او بیا رغونې کار تیر کال په ۷ لاټونو کې پیل کړی و، چې دا مهال یې د یادو ۷ لاټونو څخه د ځینو برخو کار بشپړ شوی دی او د یاد وزارت سرپرست وزیر تخنیکي ټیمونو او انجینیرانو ته لارښونه وکړه چې د پاتې برخو کار دې په نورو بېلابېلو کوچنیو لاټونو و وېشي، ترڅو د نورو شرکتونو سره د داوطلبۍ له لارې قرارداد شي او په راتلونکي کال کې یې کار بیا پیل شي.
همدارنګه د ټولګټو وزارت سرپرست وزیر په دغه سفر کې د کابل – کندهار لویې لارې اړوند په دامان ولسوالۍ کې د یو محراب مسجد له رغنیزو چارو څخه لیدنه وکړه او اړوندو مسئولینو ته یې د کار د چټکتیا او غوره کیفیت په اړه لازمې لارښونې وکړې.
د یادونې وړده چې د ټولګټو وزارت د سرپرست وزیر په لارښوونه د یاد وزارت تخنیکي ټیمونو د کندهار – ارزګان لویې لارې له کاري بهیر څخه د لیدنې ترڅنګه د کندهار ولایت د حلقوي سړک له ټاکل کیدو څخه هم لیدنه وکړه.
