د کلیو د لار جوړونې ملي پروګرام سرپرست معرفی شو
دټولګټو وزارت د سرپرست محترم الحاج ملا عبدالمنان عمري د حکم په اساس، مفتي هارون رشید د کلیو د لار جوړونې ملي پروګرام د رئیس په توګه وټاکل شو او د محترم مفتي امیر عبدالله له لوري د دغه وزارت د یوشمير رﺉیسانو په حظورکې معرفي شو.
لومړی دغه پروګرام د قران عظیم الشان په مبارکو ایتونو سره پیل شو، د بشري منابع رئیس تاج الدین تنویر د دغه وزارت د مقام هدایت ولوستل او د کلیو د لار جوړونې ملي پروګرام نوي رئیس ته یې د بریالیتوب هیله وکړه.
ورپسې د دغه وزارت د دفتر رئیس مفتي امیر عبدالله خبرې وکړې او ویې ویل: په ادارو کې تغیر او بدلون یو اصل دی، محترم مفتي هارون رشید په هغو ریاستونو کې د پام وړ لاسته راوړنې لرلې چې د تحولاتو له پیله یې دنده ترسره کړي ده.
هغه زیاته کړه، د افغانستان په لرو پرتو سیمو کې خلک په خپلو سیمو کې سړک جوړولو ته اړتیا لري او هیله ده چې په دې مهم پروګرام کې د خلکو د ترانسپورتي ستونزو د حل لپاره اساسي کار وشي.
په پای کې د کلیو د لار جوړونې ملي پروګرام نوي رئیس مفتي هارون رشید خبرې وکړې؛ نوموړي د وزارت د رهبرۍ له باور څخه د مننې او قدردانۍ تر څنګ وویل: زه به په خپل ټول توان سره هڅه وکړم، چې د وزارت اهدافو او پالیسیو ته په پام سره د خلکو ترانسپورتي ستونزې هوارې کړم.
د ټولګټو وزارت رسنيز دفتر
