د یکاولنگ – دره صوف سړک چارې څه باندې ۵۸ سلنه پرمختګ لري
د یکاولنګ - دره صوف سړک چې ټولټال ۱۸۳.۵کیلومتره اوږدوالی لري، د بامیانو ولایت له یکاولنګ ولسوالۍ څخه پیل د سمنګان ولایت تر دره صوف ولسوالۍ پورې غځېږي چې ۱۰ متره عمومي پلنوالی لري او په دوو لینو کې جوړیږي.
اوس مهال د ټولګټو وزارت له لوري په بامیانو ولایت کې د ۸۷ کیلومتره سړک چارې په چټکۍ سره روانې دي، چې ۵۸.۲۷ سلنه کاري پرمختګ لري.
د یادې ملي پروژې رغنېز کار د ټولګټو وزارت له لوري له یوخصوصي ودانیز شرکت سره تړون شوی، چې ټول مالي لګښت یې د آسیا پراختیایي بانک له لوري ورکول کېږي.
د یکاولنګ ـ دره صوف سړک، د شمال ـ سویل دهلیز یوه برخه ده، چې له بشپړېدو سره به یې د هېواد شمالي ولایتونه له سویلي ولایتونو سره د پخوا په پرتله په لنډ واټن ونښلي او همدارنګه به په اقتصادي وده، د سوداګریزو او کرنیزو توکو په لېږد او دغه راز د منظم ټرانسپورټي سیسټم په رامنځته کولو کې اغیزمن رول ولري.
د دې پروژې پلي کیدل د سړک پر مسیر د ګڼو اوسېدونکو لپاره کاري فرصتونه هم رامنځته کړي او د سړک د دې برخې له جوړیدو سره به ده بهبود، ارغوشه، ذردیگاه، خاک داؤپائین او بالا کلیو اوسېدونکې له پاخه او اساسي سړک څخه برخمن شي.
