لغمان: د مهترلام ښار اړوند د ده زیارت پُل د ترمیم چارې پیل شوې
ټولګټو وزارت د لغمان ولایت د مرکز مهترلام ښار اړوند د حلقوي سړک په اوږدو کې د ده زیارت پل د ترمیم او بیارغونې چارې پيل کړې.
دا پُل چې ۱۰۰ متره اوږدوالی او ۵ متره پلنوالی لري، کال وړاندې د سختو سیلابونو د راوتلو له کبله ویجاړ شوی و، چې د سیمې اوسېدونکي یې د تګ راتګ پرمهال له ګڼو ترانسپورتي ستونزو سره مخ کړي وو.
ټولګټو وزارت د سیمې د اوسېدونکو د تګ راتګ ستونزې ته د رسېدنې په موخه د یاد پله د ترمیم او بیاروغنې چارې پیل کړې، چې تر راتلونکي یوې میاشتې پورې به بشپړې شي.
د سیمې خلک د ټولګټو وزارت له لوري د دغه پُل په ترمیمولو او بیارغونه خوښ دي، چې د کار له بشپړېدلو سره به یې د عمرزیي، غونډۍ، شمکت او ده زیارت سیمو په ګډون د ګڼو نورو کلیو د اوسېدونکو د تګ راتګ ستونزې هوارې شي او د لغمان مرکز مهترلام ښار ته به د پخوا په پرتله په اسانه او لنډه لار تګ راتګ وکړي.
