په غزني ولایت کې د خون کوتل سړک د جوړولو چارې ۶۳۲ میلیونه افغانیو په ارزښت جریان لري
د غزني ولایت د اجرستان ولسوالۍ اړوند د خون کوتل سړک د جوړولو چارې د شاوخوا ۶۳۲ میلیونه افغانیو په ارزښت د ا.ا.ا د ټولګټو وزارت له لوري له خصوصي سکټور سره قرارداد شوې دي او دا مهال د ٤٧ سلنه فزیکي سره په چټکۍ جریان لري.
یاد سړک ۲۷.۸ کیلومتره اوږدوالی او ۹ متره پلنوالی لري او د خون کوتل له لارې د اجرستان او مالستان ولسوالۍ سره نښلوي.
د یاد سړک په اوږدو کې ۱۵۳ کوچنیو او لویو پلګوټو، ۵۲۸۶ متره استنادي دېوالونو او د دوه واشونو کار هم شامل دی، چې د يادو پلګوټو له ډلې د ٤٠ پایې پلګوټو کار بشپړ، ۳۵ پایې پلګوټي تر کار لاندې او د ۷۸ پلګوټورغنیزې چاري به ژر پیل شي.
د خون کوتل سړک د غزني ولایت له مهمو مواصلاتي لارو څخه شمېرل کېږي، چې په بشپړېدو سره به یې د اجرستان او مالستان ولسواليو سربېره د دايکندي او ارزګان ولايتونو د اوسېدونکو د تګ راتګ ستونزې هم هوارې شي.
