د مزار – حیرتان لويې لارې له شګو د پاکولو چارې ګړندۍ روانې دي
د بلخ ولايت ټولګټو رياست له لورې د مزارشريف – حيرتان لويې لارې ډيری برخې له طوپانې شګو څخه پاکې او لا هم د پاکارۍ دغه چارې په چټکۍ سره روانې دي.
د ورستيو تيزو بادونو له امله د یادې لويې لارې ځينې برخي طوپاني شګو لاندې کړي وې چې خلک يې له يو لړ ترافیکي ستونزو سره مخ کړي وو؛ د يادې ستونزې د حل په موخه د بلخ ولايت ټولګټو ریاست د خپلې شته ماشينرۍ او پرسونل پر مټ دا لويه لاره د هر ډول ترافيکو پر مخ خلاصه کړه.
د مزار شريف ـ حیرتان لويه لاره د هېواد له مهمو ترانزيټي لويو لارو څخه شمېرل کيږي چې د مزار شريف ښار د حیرتان بندر له لاري له ازبکستان سره نښلوي.
د ټولګټو وزارت رسنېز دفتر
