په تخار ولایت کې درې پروژې د څه باندې ۳۴.۹ میلیونه افغانیو په ارزښت تطبیق کیږي.
د ټولګټو وزارت لخوا په تخار ولایت کې د درېیو ترمیماتي پروژو کار د څه باندې ۳۴.۹ میلیونه افغانیو په ارزښت پیل او دامهال عملاً جریان لري.
په یادو پروژوکې لومړی د تخار – بدخشان ۵۸ کیلومتره سړک ترمیماتي پروژه ده چې د دغه وزارت له خوا د یو ودانيز او سړک جوړونې شرکت سره د ۱۶۰۰۰۰۰۰ افغانیو په ارزښت قراردا شوې ده، چې رغنیزې چارې به یې د پنځو میاشتو په موده کې پای ته ورسیږي.
دغه راز دوهمه پروژه د تخار – کندوز د ۳۲.۳ کیلومتره سړک د ترمیم او بیا رغونې کار دی، چې د ټولګټو وزارت لخوا د یو ودانیز او سړک جوړونې شرکت سره د ۱۶۰۰۰۰۰۰ افغانیو په ارزښت قرارداد شوی، چې رغنیزې چارې به یې د پنځو میاشتو په موده کې پای ته ورسیږي.
او همدارنګه دریمه پروژه د تخار ولایت له مرکز څخه پیل د بهارک، خواجه غار او دشت رباط ولسوالیو څخه په تېرېدو ترفرخار ولسوالۍ پورې د سړک د ترمیم او داغګیرۍ پروژه ده چې د یاد وزارت لخوا د ۲۹۸۱۴۰۹ افغانیو په ارزښت د یو ودانیز او سړک جوړونې شرکت سره قرارداد شوې ده چې د ترمیم او داغګیرۍ چارې به یې په درېیو میاشتو په موده کې پای ته ورسیږي.
د یادونې وړ ده چې، د یادو پروژو په بشپړېدو سره به په یادو مسیرونو د تلونکو مسافرو د تګ راتګ ستونزې د پخوا په پرتله هوارې شي او خلک به په اسانۍ سره تګ راتګ وکړي.
