د ټولګټو وزارت د اوسپنيزې کرښې مرستيال د سوګدیانا ترانس کمپنۍ له مسوولينو سره وکتل
د رياست الوزراء د اقتصادي معاونيت د هدايت په اساس د ټولګټو وزارت د اوسپنيزې کرښې مرستيال محترم مولوي محمد اسحاق صاحبزاده تر سرپرستۍ لاندې مل پلاوي د حيرتان بندر د تخليې او بارګيرۍ د تسريع په تړاو له سوگدیانا ترانس شرکت له مسوولینو سره وکتل.
ياده ليدنه چې په حيرتان بندر کې ترسره شوه، ددغه بندر څخه د ريلي واګونو د تراکم موضوع د حل کېدو، د اوسپنيزو کرښو د فعاله ساتلو، د سټيشنونو د پوره ظرفيت په کار اچولو او د تخليې او بارګيرۍ چارو د چټکتيا په تړاو مفصل بحثونه ترسره او لازم تصاميم ونيول شول.
د يادونې وړ ده، چې د ټولګټو وزارت د اوسپنيزې کرښې مرستيال او مل پلاوي د ياد شرکت د مسوولينو سره په ګډه ددغه سفر په جريان کې د حيرتان بندر اړوند له اوسپنیزې کرښې، سټيشنونو او ريلي تاسيساتو ځخه هم ليدنه او ارزونه ترسره کړې ده.
سوگدیانا ترانس ازبکستانۍ شرکت دی، چې له تيرو څو کلونو راهيسې د ترسره شوي تړون له مخې، د حيرتان بندر له لارې د سوداګريزو توکو د انتقالاتي چارو مسووليت په غاړه لري.
