د سالنګونو پر لويه لار د واورې اورښت جريان لري او د غور-کابل لويه لار د بندبګک په سيمه کې د ترافيکو پر مخ تړلې ده
د سالنګونو پر لويه لار تېره شپه د واورې اورښت پيل شوی دی، چې تر دې مهاله جريان لري.
دا مهال په سویلي او شمالي سالنګ کې د واورې ضخامت ۷ سانتي متره ته رسېږي، د ليد ساحه ۳ کيلو متره ده، د باد چټکتيا په يوه ثانيه کې ۲ متره ده او د تودوخې لوړه درجه ۱.۵- ، د تودوخې ټيټه درجه ۷- درجو ته رسیږي.
تيزرفتاره وسايط کولی شئ چې له دواړو خواوو څخه تګ راتګ وکړي.
دغه راز د کابل-غور لويه لار د بندبګک په سيمه کې د واورې د اورښت له امله د ترافيکو پر مخ بنده شوې ده، چې د ياد ولايت د ټولګټو رياست هڅه کوي چې ژرترژره ياد مسير پاکاري او د ترافيکو پر مخ پرانيزي.
د يادونې وړ ده، چې په ځينو نورو ولاياتو کې هم د واورې اورښت جريان لري؛ خو د يادو ولاياتو مسيرونه د تګ راتګ پر مخ پرانيستي دي او کومه ستونزه شتون نه لري.
د ټولګټو وزارت د ټولو درنو هېوادوالو او موټرچلوونکو څخه د دوی د خونديتوب په موخه هيله کوي، چې د سالنګونو د لويې لارې څخه د تګ راتګ پر وخت تودې جامې او نور ژمني توکي د ځان سره ولري ، د پوره احتياط څخه کار واخلي ، ترافيکي قوانين مراعات کړي او د يادو لارو د مؤظفينو لارښوونو ته پاملرنه وکړي.
