په پکتیکا ولایت کې د مرکز ښرنې – ارګون سړک د ترمیم او بیارغوونې چارې پیل شوې
د ا.ا.ا ټولګټو وزارت له لوري په پکتیکا ولایت کې د مرکز ښرنې – ارګون پر مسیر له پي ار ټي څخه تر پیرکوتي پورې د ۵۰ کیلومتره سړک د ترمیم او بیارغوونې چارې د خصوصي سکټور سره د ۲۵ میلیونه او ۳۰۱ زره افغانیو په ارزښت قرارداد او د یاد ولایت ټولګټو ریاست رئیس محترم مولوي محمد اکبر عادل، سیمه ایزو مسوولینو او قومي مخورو په شتون کې عملاً پیل شوې.
په دغه پروژه کې د سړک د فرش د ترمیم تر څنګ د ۸ پایو پلونو، ۱۱ پایو پلګوټو او ۲۰۰ متره سړک غاړې ویالو د ترمیم او بیارغوونې چارې شاملې دي، چې د ۸ میاشتو په موده کې به بشپړې او ګټه اخیستنې ته وسپارل شي.
د یادونې وړ ده، چې د دغې پروژې په بشپړېدو سره به د سیمې د اوسېدونکو د تګ راتګ او سوداګریزو توکو د لېږد رالېږد په برخه کې د پام وړ اسانتیاوې برابرې شي.
