د ټولګټو وزارت سرپرست وزیر په کابل کې د چین هیواد له سفیر سره وکتل
د ا.ا.ا د ټولګټو وزارت سرپرست وزیر محترم الحاج ملا محمدعیسی ثاني په کابل کې د چین هیواد له سفیر ښاغلي ژاو شینګ سره په خپل کاري دفتر کې وکتل او دواړو لورو په یو شمېر مهمو موضوعاتو خبرې اترې وکړې.
په دغه لیدنه کې د ټولګټو وزارت سرپرست وزیر محترم الحاج ملا محمدعیسی ثاني ښاغلي ژاو شینګ ته د ښه راغلاست تر څنګ و ویل چې افغانستان او چین یوله بل سره اوږدمهاله ټولنیزې، اقتصادي او سیاسي اړیکې لري او د یاد هېواد له دوامداره همکاریو څخه یې مننه وکړه.
دغه راز دواړو لور د واخان دهلیز( وریښمنو لارې) په اړه چې افغانستان له چین سره نښلوي هم خبرې اترې او هراړخیز بحث وکړ او د ټولګټو زوارت سرپرست وزیر و ویل، چې د یاد سړک د سروې چارې د ټولګټو وزارت له لوري بشپړې شوې دي او د ډیزاین چارې یې دامهال جریان لري او په دې اړه به د دواړو هیوادونو ترمنځ بحثونه دوام ولري.
همدارنګه په دغه ناسته کې د افغان ټرانس پروژې په اړه خبرې اترې ترسره شوې چې یاده پروژه د مرکزي اسیا هېوادونه د افغانستان له لارې له جنوبي اسیا هېوادونو سره نښلوي او د ټولګټو وزارت سرپرست وزیر و ویل چې په دې اړه د ا.ا.ا د رهبرۍ په سطحه مذاکرات له یادو هېوادونو سره ترسره شوي دي او لا هم دوام لري او د ا.ا.ا د ټولګټو وزارت د یادې پروژې پیلولو ته بشپړ چمتووالی لري.
په پای کې دواړو لورو د افغانستان او چین ترمنځ د دوامداره اقتصادي اړیکو، سوداګریزې راکړې ورکړې او د زېربنایي پروژو په برخه کې پر همکارۍ ټیګار وکړ.
