د ۱۴۰۴ هـ.ش. کال په لومړیو شپږو میاشتو کې د اوسپنې پټلۍ په انتقالاتو کې (۱۱.۱۵) سلنه زیاتوالی راغلی

د ۱۴۰۴ هـ.ش. کال په لومړیو شپږو میاشتو کې د ټولګټو وزارت د اوسپنې پټلۍ له لارې د انتقالاتو کچه د تېر کال د شپږو مياشتو په پرتله (۱۱.۱۵) سلنه لوړه شوې ده.

د ۱۴۰۳ هـ.ش. کال په لومړیو شپږو میاشتو کې د اوسپنې پټلۍ له لارې ټولټال (۱۹۶۲۶۵۹) مټريک ټنه انتقالات ترسره شوي وو، خو د ۱۴۰۴ هـ.ش. کال په لومړیو شپږو میاشتو کې دغه کچه (۲۱۸۱۵۴۴) مټريک ټنه ته لوړه شوې ده.

په تيرو شپږ مياشتو کې تېل، مايع ګاز، غنم، اوړه، غوړي او داسې نور غذايي او ساختماني مواد هيواد ته وارد او وچه مېوه، د آنارو جوس، معدني ډبرې، کچالو او وريجې ټرانزيټ او صادر شوي دي.

د اوسپنې پټلۍ د انتقالاتو او صادراتو په برخه کې دغه (۱۱.۱۵) سلنه زیاتوالی د هېواد په کچه یو مثبت اقتصادي پرمختګ بلل کېږي.

هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کې اقتصادي ثبات، ترقۍ او ځان بسياينې ته لاره هواریږي.

د ا.ا.ا د ټولګټو وزارت هڅه کوي، ترڅو د لا زیاتو انتقالاتو لپاره مناسب شرایط برابر او سوداگرو ته لا زياتې اسانتياوې برابرې کړي.