د مزارشریف – دره صوف سړک د ترمیم او داغګیرۍ چارې د ۱۵۹ میلیونه افغانیو په ارزښت پيل شوې
د مزارشریف – دره صوف سړک د ترمیم او داغګیرۍ چارې نن د بلخ ولایت مقام د والي مرستیال محترم مولوي نورالهادي ابو ادریس، دیاد ولایت د تولګټو رئیس مولوي عبدالصبور صابر، د ځینو سیمه ییزو مسؤلینو، مجاهدینو او د سیمې د ځینو مخورو په شتون کې پیل شوې.
د مزارشریف – دره صوف سړک ۵۶.۳ کیلومتره اوږدوالي لري، چې د یاد ولایت له شولګرې ولسوالۍ څخه پیل د سمنګان ولایت تر حدودو پورې رسیږي، د ترمیم او داغګیرۍ چارې د ټولګټو وزارت او خصوصي سکتور ترمنځ د ۱۵۹ میلیونه افغانیو په ارزښت قرارداد شوې دي، چې نن یې کار رسماً پيل شو.
په یاده پروژه کې د یو شمیر پلګوټو او استنادي دیوالونو د ترمیم او بیارغونې کارونه هم شامل دي، چې د یو کال په موده کې به یې کار بشپړ او ګټې اخیستنې ته به وسپارل شي.
د یادونې وړ ده، چې د یادې پروژې د چارو په بشپړیدو سره به د خلکو ټرانسپورتي ستونزې د پخوا په پرتله هوارې شي او د کرنیزو او سوداګریزو توکو په چټک او خوندي انتقال کې به د پام وړ آسانتیاوې رامنځ ته شي.
