سالنګ د لویو بار وړونکو او د پنجشېر انجمن کوتل د ټولو موټرو پر مخ وتړل شو
له ولایتونو څخه د ټولګټو وزارت د ټیمونو د راپور پر بنسټ د واورې د اورښت، ښویېدنې او تیز باد له کبله د پنجشېر ولایت د انجمن کوتل لار د موټرو پرمخ بنده شوي. دا لار به د هوا له سمېدو سره د یاد ولایت د ټولګټو ریاست د ماشینرۍ په مرسته بیرته پرانستل شي.
بل پلو په سالنګونو کې د تیرې شپې تر ۱۲ بجو پورې واوره اورېدلې چې اندازه یې ۱۰ سانتي متره ښودل شوي او له ګواښونو څخه د مخنیوي په پار یاده لار د لویو باروړونکو یا ټېلري موټرو پر مخ تړل شوې خو نور موټر پرې تګ راتګ کولی شي.
د یادونې وړه ده چې د سالنګونو د ساتنې او څارنې ریاست کارکوونکي د ترافیکو د منظم جریان او لارې پرانیستو په موخه د سالنګ په دواړو خواوو کې لاس په کار شوي دي.
د وري ۱۶، ۱۴۰۰
د ټولګټو وزارت ـ کابل
