ټولګټو وزارت د فساد سره د جدي مبارزې لپاره د وړتیا لوړونې عملي او مسلکي کورس پیل کړ
د ټولګټو وزارت رهبري چې له فساد سره کلکې مبارزې ته ژمنه ده او تر دې مهاله یې ګڼې لاسته راوړنې هم درلودلې دي اوس مهال یې د داخلي تفتیش د وړتیاوو د پیاوړتیا لپاره د عملي او مسلکي لارو چارو د زده کړې کورس پیل کړ
دا دوه میاشتنی کورس به یوه میاشت د ټولګټو وزارت د تفتیش څانګې د استادانو او دویمه میاشت به د مالیې وزارت د تفتیش د استادانو له خوا پر مخ وړل کیږي
د کورس پر مهال به ځوانو مفتیشینو او د تفتیش ادارې کارکوونکو ته د قوانینو، مقررو او طرزالعملونو د پلي کېدو او هغو لارو چارو ښودنه کیږي چې د فساد پر وړاندې د مبارزې لپاره کارول کیږي تر څو په اغېزناکه توګه د تفتیش پړاونه بشپړکړی شي
هغوی ته به په دې کورس کې د علمي، حقوقي او تقنیني مسایلو د ور زده کولو تر څنګ په چارو کې د روڼتیا رامنځته کېدو او هېواد پالنې روحیه هم ورکول کیږي تر څو د آبادۍ په موخه غوره تفتیش وکړي
د ټولګټو وزارت د تفتیش ریاست د ۱۳۹۹ کال د تلې میاشتې راهیسې تر دې مهاله ۲۸ قضیې څېړلې چې له مخې یې ۳۷ کسان عدلي او قضايي ارګانونو ته ور پیژندلې
په یادو کسانو کې د سروې کوونکي له بست څخه نیولې بیا د مدیرانو، آمرینو، رییسانو او آن د معین تر کچې کسان شامل دي.
همدا رانګه په یاده موده کې ۵۳ کسان د افغانستان د ملکي خدمتونو د قانون له مخې تادیب شوي او تر څنګ یې اوس مهال ۳۷ نورې قضیې هم تر څېړنې لاندې لري.
