په بلخ ولایت کې د کشنده ولسوالۍ ۱۸ کیلومتره سړک د رغولو چارې د ۴۵۰ میلیونه افغانیو په ارزښت پيل شوې
د ا.ا.ا د ټولګټو وزارت له لوري په بلخ ولایت کې د مزارشریف دره صوف عمومي مسیر د پل برق دوراهي – کشنده ولسوالۍ ۱۸ کیلومتره سړک د ډیزاین او رغولوچارې په ډیزاین بلټ شکل د ۴۵۰ میلیونه افغانیو په ارزښت د ټولګټو وزارت تخنیکي معین محترم الحاج مولوي عبد الکریم فاتح، د بلخ ولایت د والي مرستیال محترم مولوي نورالهادي ابو ادریس، د یاد ولایت د ټولګټو ریاست رئیس محترم الحاج مولوي عبدالصبورصابر، یو شمېر سیمه ییزو مسؤلانو او قومي مخورو په شتون کې پيل شوې.
دغه سړک ۱۸ کیلومتره اوږدوالی او ۱۰ متره پلنوالی لري، چې شپږ متره یې په آسفالټ شکل او دواړو خواوو ته یې دوه دوه متره شولډرونه دي او په اوږدو کې د دوه پایې پلونو، استنادي دېوالونو، واشونو او یو شمېر پلګوټو درغونې کار هم شامل دی چې د ۲۲ میاشتو په موده کې به یې کار بشپړ او ګټې اخیستنې ته وسپارل شي.
د یاد سړک د کار په جریان کې به د سیمې یو شمېر اوسېدونکو ته د کار زمینه برابره شي او په بشپړېدو سره به یې د بلخ ولایت د کشنده او زارع او د سرپل ولایت د ګوسفندې او بلخاب ولسوالیو د اوسېدونکو د تګ راتګ، د بلخ ولایت د سفید سنګ د ډبرو سکرو او د سرپل ولایت د بلخ آب د ډبروسکرو د پروسس او استخراج او کرنیزو محصولاتو د انتقالاتو په برخه کې به د پام وړ آسانتیاوې رامنځته شي.
دا په داسې حال کې ده، چې څه موده وړاندې د ا.ا.ا دټولګټو وزارت له لوري په بلخ ولایت کې د بلخ - شبرغان لویې لارې د ۲۵ کیلومتره سړک په تخمیني ډول د څه باندې ۷۵۲ میلوینه افغانیو په ارزښت او د مزارشیف – دره صوف سړک د ترمیم او داغګیرۍ چارې د ۱۵۹ میلیونه افغانیو په ارزښت پیل شوې دي او دا مهال عملاً جریان لري.
