په سالنګ ولسوالۍ کې د کېبلي پله پر ځای اساسي پول جوړیږي
د پروان ولایت په سالنګ ولسوالۍ کې د هغه پله پر ځای اساسي پُل جوړیږي چې خلکو به په یوه کېبل پسې نښتې جالۍ کې ځانونه ځوړندول او تر سیند به پورې وتل.
ټولګټو وزارت دې ستونزې ته په کتو سره اوس مهال په یاده سیمه کې د خطرناک کېبلي پله پر ځای ۳۰ متره اساسي پل او ۲۰۰ متره کانکرېټي سړک جوړوي.
د دې پروژې د رغنیز کار تړون د ټولګټو وزارت لخوا له یوه خصوصي ودانیز شرکت سره شوی، چې مالي لګښت یې د هیواد له ملي بودیجې څخه ورکول کیږي.
د دغه پله له جوړېدو سره به د سیمې د اوسېدونکو د تګ راتګ ستونزې هوارې او د جوړېدو پر مهال یې هغوی کاري فرصتونه رامنځته شوي دي.
د یادولو وړ ده، چې ټولګټو وزارت د کلیو د لار جوړونې ملي پروګرام ( NRAP) له لارې هڅه کوي چې د هیواد په لرو او ورسته پاتې سیمو کې د خلکو د تګ راتګ لپاره لارې او پلونه جوړ کړي.
