په لغمان ولایت کې د دوو پروژو چارې د ۱۳.۳ میلیونه افغانیو په ارزښت بشپړې شوې
د ا.ا.ا د ټولګټو وزارت لخوا په لغمان ولایت کې د دوو پروژو چارې د ۱۳.۳ میلیونه افغانیو په ارزښت بشپړې او د یولړ مراسمو په ترڅ کې، چې د لغمان ولایت والي محترم الحاج قاري بختیار معاذ، د یاد ولایت د ټولګټو رئیس مولوي همایون احمدي، یوشمیر سیمه ییزو مسؤلانو، دیني علماوو او قومي مخورو پکې ګډون کړی و ګټې اخیستنې ته وسپارل شوې.
د کابل – جلال آباد لویې لارې اړوند د ۴۷ کیلومتره سړک د ویجاړو شویو برخو د ترمیم چارې، چې د ټولکټو وزارت لخوا له خصوصي سکتور سره د ۱۰ میلیوه افغانیو په ارزښت قرارداد شوې وې او په اوږدو کې یې د یوشمیر پلګوټو، سړک غاړې ویالو او استنادي دیوالونو د ترمیم او بیا رغونې کار هم شامل وو، دا مهال یې د ترمیم چارې بشپړې شوې دي.
دغه راز په یاد ولایت کې د الینګار ولسوالۍ اړوند د کندې شیخان پل د پاتې برخو د رغونې چارې ترسره شوې دي، چې ۳.۳ میلیونه افغاني د ټولګټو وزارت لخوا او پاتې لګښت یې د ځایې خلکو په مالي ملاتړ تمویل شوی دی، چې دا مهال دیادې پروژې چارې په بشپړه توګه ترسره شوې دي.
د یادو پروژو د کار په بشپړیدو سره پریادو لارو د تلونکو هېواد والو د تګ راتګ او سواداګریزو توکو او کرنیزو محصولاتو د انتقال ستونزې د پخوا په پرتله هوارې شوې دي.
