د ټولګټو وزیر د میل ۷۸ ابو النصر فراهي سړک له رغنیزو چارو څخه لیدنه وکړه
د ا.ا.ا د ټولګټو وزیر محترم الحاج ملا محمد عیسی ثاني، د یو تخنیکي پلاوي په مشرۍ، جنوب لوېدیځ زون ته د خپل کاري سفر په دوام د فراه ولایت د میل ۷۸ ابو نصر فراهي سړک د رغنیزو چارو له جریان څخه لیدنه ترسره کړه.
په دې لیدنه کې نوموړي د پروژې د کاري پرمختګ، کیفیت او د انجینري معیارونو د تطبیق بهیر له نږدې وڅېړه او د چارو د ښه مدیریت په موخه یې اړوندو مسؤلینو ته لازمې لارښوونې وکړې، څو د سړک د رغونې چارې په ټاکلي وخت او د تخنیکي او معیاري اصولو مطابق بشپړې شي.
د میل ۷۸ ابو نصر فراهي سړک ټولټال ۱۱۷ کیلومتره اوږدوالی لري، چې له دې جملې څخه ۶۴ کیلومتره یې پخوا رغول شوی دی. د پاتې ۵۳ کیلومتره برخې له جملې څخه یې د ۴۵ کیلومتره سړک رغنیزې چارې بشپړې شوې دي او د پاتې برخو چارې یې په چټکۍ سره دوام لري.
د میل ۷۸ – ابو نصر فراهي بندر سړک د هېواد له مهمو اقتصادي او ترانزیټي لارو څخه دی، چې د فراه ولایت د ابو نصر فراهي سرحدي بندر له لارې افغانستان له ایران سره نښلوي. د دې سړک رغونه د سوداګریزو توکو د لېږد رالېږد اسانتیا برابروي، د ترانسپورتي لګښتونو په کمولو کې مرسته کوي او د سیمې د اقتصادي ودې او سوداګریزو اړیکو په پیاوړتیا کې مهم رول لري.
