خبرتیا!د سالنګونو لویه لار له لوی اختر وروسته د هر ډول ټیلري وسایطو پرمخ تړل کیږي
د ا.ا.ا ټولګټو وزارت د سالنګونو لویې لارې د پاتې برخو د اساسي بیارغونې کار پیل کړی دی، چې د کار د ښه ترسره کېدو په موخه یاده لویه لار له لوی اختر وروسته ( د ۱۴۴۶هـ.ق کال د ذوالحجې په ۱۳مه، چې د ۱۴۰۴ هـ. ش کال د جوزا میاشتې له ۲۰مې نیټې سره سمون لري) د هر ډول ټیلري وسایطو پرمخ د روان کال د کاري پلان تر بشپړېدو پورې تړل کیږي.
ټولګټووزارت درنو هېوادوالو، سوداګرو او موټرچلوونکو ته د اسانتیاو برابرولو په موخه د اصلي مسیر په یو خط کار کوي او له بل خط څخه هر ډول لنډیو بار وړونکو وسایطو ته په نوبتي ډول یوه شپه له شمال څخه جنوب او بله شپه له جنوب څخه شمال لوري ته د تګ اجازه ورکوي.
دغه راز مسافر وړونکي وسایط د (۳۰۳ ، ۴۰۴ ، ۵۸۰) وسایطو په شمول کولای شي، چې د یادې لویې لارې له چمتو شوي بدیل( فرعي) مسیر څخه له دواړو خواوو، په ۲۴ ساعته ډول تګ راتګ وکړي.
ټولګټو وزارت تر ډېره بریده هڅه کوي، چې یاده لویه لار په غوره کیفیت ورغوي او له درنو هېوادوالو څخه غوښتنه کوي، چې د يادې لويې لارې د روان کال کاري پلان تر بشپړېدو پورې له حوصله مندۍ څخه کار واخلي او په یاده برخه کې له ټولګټووزارت سره همکاري وکړي.
