د غزني – ښرنې لویې لارې د ترمیم پروژه د ټولګټو وزارت له لوري په چټکۍ سره جریان لري
د ا.ا.ا د ټولګټو وزارت له لوري د غزني – ښرنې لویې لارې د ۴۵ کیلومتره برخې د ترمیم پروژه، د څه باندې ۱۴۵ میلیونه افغانیو په ارزښت له خصوصي سکتور سره قرارداد شوې ده او دا مهال یې عملي چارې په چټکۍ سره جریان لري.
یاد سړک د غزني ښار د ترانسپورټ له څلورلارې څخه پیل کېږي او د اندړ ولسوالۍ د بند سردې سیمې (د پکتیکا ولایت تر حدودو) پورې غځېږي.
دغه مسیر د غزني او پکتیکا ولایتونه سره نښلوي او د خلکو د تګ راتګ، د سوداګریزو توکو او کرنیزو محصولاتو د لېږد رالېږد او د سیمې د اقتصادي فعالیتونو په پراختیا کې مهم رول لري.
د ا.ا.ا د ټولګټو وزارت هڅه کوي، چې د هېواد په بېلابېلو سیمو کې د کوچنیو او لویو پراختیایي پروژو په پلي کولو سره، د هېوادوالو لپاره د اقتصادي فعالیتونو د ودې او خوندي تګ راتګ زمینه برابره کړي.
