د هېواد د آبادۍ دښمنانو په پکتیکا کې یو پُل او یو پلګوټی نړولي
د ګران هېواد د آبادۍ دښمنانو په پکتیکا ولایت کې تېره شپه د ښرنې – انګور هډې پر سړک چې یو ټرانزیټي مسیر دی یو پل او یو پلګوټی په بمونو الوزولي. نړول شوی پل د سر روضې ولسوالۍ په پړاو کلي او پلګوټی د ارګون ولسوالۍ په شاطورو سیمه کې په بمونو الوزول شوي چې خلکو ته یې ګڼې ستونزې جوړې کړې دي. یاد پل د ۶۰ متره اوږدوالي په درلودلو سره په دریو وایو کې جوړ شوی چې یوه وایه یې په بشپړه توګه ورانه شوې او پر بیا رغونه به یې شاوخوا ۴۵ میلیونونه افغانۍ لګښت راشي. د هېواد د آبادۍ دښمنانو په روانه اونۍ کې یو پل او دوه پلګوټي د کندوز په امام صاحب ولسوالۍ کې یو پلګوټی د میدان ښار – کابل او یو پلګوټی د کابل – لوګر پر مسیر هم په بمونو الوزولي دي.
