د هېواد د لویو لارو او سړکونو وضعیت
په تېرو دوو ورځو کې د هېواد په یو شمېر ولایتونو کې ځینې لویې لارې او نښلوونکي مسیرونه د پرلهپسې بارانونو او د سېلابونو د راوتلو له امله په موقتي ډول د ترافیکو پر مخ تړل شوي وو.
د کابل–جلالآباد لویه لار د ماهیپر په سیمه کې، د پروان–بامیان لویه لار د پروان ولایت د شینواري ولسوالۍ اړوند د استامې درې، چناردرې او دوز درې په سیمو کې، د ایبک–مزارشریف لویه لار د واش لرغان په سیمه کې، د دره صوف ولسوالۍ – مزارشریف او سمنګان مسیر، د بادغیس–فاریاب لویه لار، د مرکزي بغلان – نهرین د لارې ځینې برخې، او همدارنګه د سمنګان ولایت د خرم او سارباغ ولسوالۍ سړک د ترافیکو پر مخ تړل شوي وو، چې د ټولګټو وزارت د ولایتي پرسونل د شپې او ورځې هڅو په پایله کې بېرته د ترافیکو پر مخ پرانیستل شول.
همدارنګه د بلخ ولایت د چهارکنت ولسوالۍ مسیر، چې له پرون راهیسې د ترافیکو پر مخ تړل شوی و، اوس بېرته پرانیستل شوی دی او په دې مسیر کې د رسوباتو د پاکولو، د سړک د پراخولو او د زیانمنو شوو برخو د ترمیم چارې د بلخ د ټولګټو ریاست د تخنیکي ټیمونو له لوري لا هم جریان لري.
دا په داسې حال کې ده، چې د سمنګان ولایت د خرم او سارباغ ولسوالۍ سړک، سره له دې چې د یاد ولایت د ټولګټو ریاست له لوري پاک شوی و، د پرلهپسې بارانونو او سېلابونو د راوتلو له امله یو ځل بیا د ترافیکو پر مخ تړل شوی او د بېرته پرانیستلو لپاره یې جدي هڅې روانې دي.
د یادونې وړ ده، چې د هېواد په یو شمېر نورو ولایتونو کې هم له تېرو دوو ورځو راهیسې شدید بارانونه دوام لري او د ټولګټو وزارت ولایتي ټیمونه د لویو لارو او سړکونو د بېلابېلو برخو په ترمیم او پاککارۍ باندې بوخت دي.
