د ټولګټو وزارت محترم وزیر په لوګر ولایت کې د یاد وزارت د تر کار لاندې پروژو څخه لیدنه وکړه
د ټولګټو وزارت محترم وزیر الحاج ملا محمد عیسی ثاني، چې د دې وزارت یو شمېر تخنیکي رئیسانو یې هم ملتیا کوله، پرون لوګر ولایت ته سفر وکړ او په دغه ولایت کې یې د ټولګټو وزارت د تر کار لاندې پروژو له کاري بهیر څخه لیدنه او ارزونه وکړه.
د ټولګټو محترم وزیر په دې سفر کې د لوګر – میدان وردګ د ۳۱ کیلومتره سړک، د پل علم – لوګر پوهنتون د ۳ کیلومتره سړک او د خضر – بادخواب روغني – دوشیخ – برکي راجان – دبر پل د ۳۲ کیلومتره سړک له رغنیزو چارو څخه لیدنه او ارزونه وکړه.
د ټولګټو محترم وزیر د یادو پروژو د لیدنې پر مهال د ځینو استنادي دېوالونو په جوړولو کې د غیرمعیاري ډبرو او همدارنګه د سړکونو د طبقو په فرش کې د غیرمعیاري جغل کارول د انجینري او سړک جوړونې له معیارونو سره په ټکر کې وبلل او تطبیق کوونکو ټیمونو او د قراردادي شرکتونو مسؤلینو ته یې لارښوونه وکړه چې یادې برخې ونړوي او د معیاري او باکیفیته موادو په کارولو سره یې بېرته ورغوي. نوموړي همدارنګه د یادو پروژو تطبیق کوونکو ټیمونو او د قراردادي شرکتونو مسؤلینو ته د پروژو د چارو د پر وخت بشپړولو په اړه لازمې لارښوونې وکړې.
د قراردادي شرکتونو مسؤلینو هم ډاډ ورکړ، د سړک هغه برخې چې په غیرمعیاري ډول رغول شوې دي، له بېرته نړولو وروسته بیا ورغوي، او همدارنګه د یادو پروژو پاتې چارې به د باکیفیته موادو په کارولو او ټاکل شوې موده کې بشپړې کړي.
د ا.ا.ا د ټولګټو وزارت هڅه کوي چې د هېواد د ترانسپورتي زېربناوو په برخه کې د پراختیايي پروژو د پلي کولو او د یادو پروژو د چارو د بهیر د دقیقې څارنې او ارزونې له لارې هېوادوالو ته د اسانه او خوندي تګ راتګ زمینه برابره کړي.
