د ټولگټو وزارت د ساتنې او څارنې مرستیال د پکتیا ولایت له مرستیال والي سره وکتل
د ټولگټو وزارت د ساتنې او څارنې مرستیال الحاج معاون ملا عبدالجبار د پکتیا ولایت د والي له مرستیال محترم شیخ الحدیث و التفسیر مولوی عزیز الرحمن منصور سره په خپل کاري دفتر کې په داسې حال کې وکتل، چې د دې وزارت د دفتر رئیس مفتي امیر عبدالله هم حضور درلود.
په دې کتنه کې د پکتیا مرستیال والي د سړکونو په برخه کې د دې ولایت د اوسېدونکو ستونزې بیان کړې، ویې ویل: په تیرو کلونو کې پکتیا ولایت ته د سړکونو او پُلونو په برخه کې بشپړه پاملرنه نه ده شوې، اوس د دې وخت رارسیدلی، چې د ټولگټو وزارت لخوا د شته سړکونو د ساتنې او څارنې تر څنگ د پکتیا د خلکو ترانسپورتي ستونزې هوارې شي.
ورپسې د ټولگټو وزارت د ساتنې او څارنې مرستیال د پکتیا مرستیال والي ته د ښه راغلاست تر څنگ د یاد ولایت لپاره د ټولگټو وزارت د راتلونکو پلاننو په اړه معلومات وړاندې کړل، ویې ویل: ټولگټو وزارت د پکتیا ولایت د ټولو سړکونو د ساتنې او څارنې لپاره پوره چمتوالی لري او د شته سړکونو د خوندیتوب لپاره به د دې وزارت له پلان او بودیجې سره سم هڅې وکړي.
هغه همدارنگه وویل: ټولگټو وزارت پلان لري، چې په ټول هیواد کې د شته سړکونو، پُلونو او پُلگوټو څخه د ساتنې او څارنې ترڅنگ د ورسته پاتې ولایتونو په لومړیتوب سره د سړکونو او پُلونو پراختیایي پروژې تطبیق کړي.
