د کابل – جلال آباد لویې لارې د ویجاړو برخو او استنادي دیوالونو د ترمیم کار جریان لري
ټولګټو وزارت د کابل – جلال آباد لویې لارې د ويجاړیدو برخو د ترمیم او بیا رغونې کار، د استنادي او محافظتي دیوالونو ترمیم، د دغه سړک اړوند یوشمېر پلګوټو پاک کاري او د سړک د لا تخریب د مخنیوي په موخه د یو شمېر استنادي دېولونو کار د کابل دروازې څخه تر لغمان ولایت پورې پیل کړی او دا مهال یې چارې عملاً جریان لري.
دغه سړک چې ۶۸ کيلومتره اوږدوالی لري، د ترمیم او بیارغونې کار يې د ټولګټو وزارت او خصوصي شرکت ترمنځ د ۲۳ میلیونه افغانیو په ارزښت قرارداد شوی چې لګښت یې د یاد وزارت له بودیجې څخه ورکول کیږي.
د یادونې وړ ده، چې د دغې لويې لارې په ترميم او بيا رغونې سره به د مسافرينو ترانسپورتي ستونزې د پخوا په پرتله هوارې شي او خلک به په اسانۍ سره تګ راتګ وکړي.
