کونړ کې د وروستيو اورښتونو له امله بندې شوې لارې پرانستل شوې
د هېواد په ختيز ولايت کونړ کې د ورښتونو او سختو سېلابونو راوتلو له امله تړل شوې لارې چې ټرافيکي تګ – راتګ يې ځنډولی و، د ټولګټو وزارت د ولايتي پرسونل په هڅو پرانستل شوې.
سېلابونو د کونړ د مرکز اسعدآباد او دوو ولسواليو اسمار او ماڼوګي ته غځېدلې لارې په قسمي شکل تخريب کړې او ځای – ځای يې د سړکونو سطحې د کاڼو او خټو له رسوبي موادو ډکې کړې وې، چې د يادو سيمو خلک يې د تګ - راتګ پرمهال له ګڼو ستونزو سره مخ کړي وو.
د کونړ ولایت د ټولګټو ریاست کارکوونکو په بېړنۍ توګه له خپلې شته ماشینرۍ څخه په ګټې اخیستنې، یادې لارې په بشپړ ډول د سیلابونو له پاتې شونو څخه پاکې او د ټرافیکو پرمخ پرانیستلې.
اوس مهال وضعيت بيرته عادي شوی او د نقليه وسايطو د تګ – راتګ پر وړاندې رامنځته شوي خنډونه له مخې ليرې شوي دي.
