په سالنګونو کې د ترافیکي پیښې له امله یو تن شهید او دوه نور ټپي شوي:
تېره شپه د جنوبي سالنګ په اولنګ سیمه کې د ډریور د بې احتیاطۍ له امله یو مسافر وړونکی موټر له ټیلر سره ټکر شوی، چې په دغه ترافیکي پیښه کې له بده مرغه یوه میرمن شهیده او دوتنه نارینه ټپي شوي.
له پيښې سره همهاله د سالنګونو د ساتنې او څارنې پرسونل سیمې ته ځان رسولی او ټپیان یې د تداوي په موخه نږدې روغتیایي مرکز ته لیږدولي دي.
ټولګټو وزارت، له ټولو موټرو چلونکو څخه په ټینګه غواړي، چې له دا ډول پیښو څخه د مخنیوي په پار؛ د سالنګ په شمول د هیواد له ټولو لویو لارو څخه د تیرېدو پرمهال دې له پوره احتیاط څخه کار واخلي، ترافیکي قوانین مراعت او د مؤظفینو لارښوونې دې په پام کې ونیسي.
د یادونې وړ ده، نن ورځ په سالنګونو کې هوا وریېځ ده او یاده لویه لاره د ترافیکي وسایطو د تګ راتګ پرمخ پرانیستې ده، دا مهال مسافر وړونکي موټر له دواړو لورو او بار وړونکي موټر له شمال څخه جنوب لوري ته تګ کولی شي.
