د ټولګټو وزارت سرپرست د ایران د سړکونو او ښارجوړونې وزیر له ځانګړي استازي سره وکتل
د ټولګټو وزارت سرپرست محترم الحاج ملا محمد عیسی ثاني، د ایران اسلامي جمهوریت د سړکونو او ښار جوړونې وزیر له ځانګړي استازي محترم سید حسین میرشفیع سره په خپل کاري دفتر کې په داسې حال کې وکتل چې د ټولګټو وزارت تخنیکي معین محترم مولوي عبدالکریم فاتح او د ایران سفارت اقتصادی مستشار محترم شیرزادی هم حضور درلود.
په دې کتنه کې د ټولګټو وزارت سرپرست، د ایران اسلامي جمهوریت د سړکونو او ښار جوړونې وزارت ځانګړي استازي ته د ښه راغلاست ترڅنګ وویل: افغانستان او ایران دوه ښه ګاونډیان، دوست او وروڼه هېوادونه دي، هغه د ترانسپورتي او ترانزیټي بېخبیناوو په برخه کې پر دوه اړخیزو همکاریو ټینګار وکړ.
په دغه ناسته کې دواړو لورو د ابو نصر فراهي (۷۸ میل) سړک د پاتې ساختماني چارو په بشپړولو، د ورېښمو د دویم پل جوړول، د دوغارون ۵۰۰ متره سړک، چې له وړاندې د ایران هېواد له لورې جوړ شوی دی د نیمایي لګښت ورکړه، د ورېښمو دویم پُل د جوړولو په داوطلبۍ کې د دواړو هېوادونو د ساختماني شرکتونو ګډون او د سالنګونو لویې لارې د نوې تونل له مسیر څخه د ایراني مهندسانو د لیدنې اړوند مفصل بحث او د نظریاتو تبادله وکړه.
د ناستې په دوام کې، د ایران هېواد د سړکونو او ښار جوړونې د وزیر ځانګړي استازي، لېوالتیا څرګنده کړه او وې ویل؛ ایران د دواړو هېوادونو ترمنځ د ټرانسپورټي زیربناوو د بیارغونې په برخه کې پر خپلو ژمنو ولاړ دی او د افغانستان له اسلامي امارت سره همکارۍ ته چمتو دی. هغه زیاته کړه، ایراني شرکتونه چمتو دي، چې د افغانستان د پرمختیایي پروژو په داوطلبۍ کې، چې د کانونو او یا هم د بودیجې په بدل کې پلي کیږي، برخه واخلي.
په پای کې د ابو نصر فراهي سړک د کار د بشپړولو او د نویو پروژو د پیل په اړه، د ټولګټو وزارت د تخنیکي معین او د ایران هېواد د سړکونو او ښار جوړونې وزیر د ځانګړي استازي ترمنځ د همکاریو هوکړه لیکونه لاسلیک شول.
