د دشت ارچي – کندز سړک د رغونې چارې د څه باندې ۴۹۸.۶ ميليونه افغانیو په ارزښت جریان لري
د ا.ا.ا د ټولګټو وزارت لخوا د کندز ولايت اړوند د دشت ارچي – کندز سړک، چې ځینې برخې یې پخوا بشپړې شوې وې او د پاتې ۱۹.۶ کیلومتره سړک د اسفالټ چارې یې د څه باندې ۴۹۸.۶ ميليونه افغانیو په ارزښت له خصوصي سکتور سره قرارداد شوې وې او دا مهال یې کار جریان لري.
دغه سړک د کندز - تخار لار د شیرخان بندر سره نښلوي، د دغه سړک په اوږدو کې د ۶۵ پایو پُلګوټو د رغونې کار هم شامل دی، چې له ډلې یې د ۴۱ پُلګوټو د رغونې کار بشپړ شوی دی او د پاتې نورو کار يې جریان لري.
د یادونې وړ ده، چې دا مهال په سیمه کې د سب بیس، پُرکارۍ، د بیس کورس د موادو تولید، د کار ځای ته د قیر (اسفالټ) د لیږدولو او د قیر اچونې چارې جریان لري.
د یادې پروژې د کار په جریان کې د سیمې یو شمیر اوسیدونکو ته د کار زمینه برابره شوې ده او په بشپړیدو سره به یې د هېوادوالو ستونزې حل او د کرنیزو او سوداګریزو توکو په خوندي او چټک انتقال کې به د پام وړ آسانتیاوې رامنځ ته شي.
دا په داسې حال کې ده، چې ټولګټو وزارت د هېواد په بیلابیلو سیمو کې د ګڼ شمیر لویو او کوچنیو پروژو چارې پیل کړې دي.
